Ijtimoiy tarmoqlarda YPX xodimi va haydovchi o‘rtasidagi janjal aks ettirilgan video tarqaldi. Holat yuzasidan YHXBB rasmiy izoh berdi. 
 
Qayd etilishicha, voqea shu yilning 18-may kuni soat 11:50larda Qamashi tumani Iftixor ko‘chasida joylashgan “Fayz dehqon bozori” hududida sodir bo‘lgan. 

Ma’lum bo‘lishicha, yo‘l-patrul xodimi M.X. “To‘xtash taqiqlangan” yo‘l belgisining ta’sir doirasida to‘xtab turgan “Kobalt” mashinasi haydovchisiga qoidabuzarligi yuzasidan tegishli hujjatlarini taqdim qilishini so‘ragan.

Fuqaro me’yoriy hujjatlarini taqdim qilgandan so‘ng, haydovchilik guvohnomasi unga tegishliligini bilish maqsadida ko‘zoynagi va bosh kiyimini yechishini so‘ragan. Haydovchi bunga e’tiroz bildirib, qog‘oz shaklidagi bayonnoma rasmiylashtirilishini so‘ragan. Huquqbuzarning talabiga ko‘ra bayonnoma rasmiylashtirilgan.

Ta’kidlanishicha, haydovchi mazkur holatdan norozi bo‘lib, tuman prokuraturasiga shikoyat qilgan. Hozirda Qamashi tuman prokuraturasi tomonidan surishtiruv harakatlari olib borilmoqda.

Eslatib o‘tamiz, avvalroq Surxondaryo viloyatida YPX xodimi tez tibbiy yordam mashinasi yo‘lini to‘sib qo‘ygani haqida xabar berilgan edi.