Bugungi kunda texnologiyalar kundan-kunga rivojlanib borishi bilan birga kompyuter va mobil o‘yinlarning ham turli xil versiyalari ishlab chiqarilmoqda. Xo‘sh ular nimasi bilan foydali?

Bolalar uchun o‘yinlar
Agar yosh farzandingiz bo‘lsa, harflar va sanashlarni o‘rgatish uchun telefon o‘yinlari ayni muddaodir. “Play market” yoki “App store” orqali harflarni va sanashni o‘rgatuvchi o‘yinlarni yuklab olsangiz, farzandingiz o‘yin o‘ynash barobarida yangi bilimlarga ham ega bo‘lib boradi.

Kattalar uchun o‘yinlar
Yana o‘sha “Play market” yoki “App store” orqali boshqotirmali o‘yinlarni yuklab olish mumkin. Ular nafaqat vaqt o‘tkazishga yordam beradi, balki miya faoliyatini ham yaxshilaydi. O‘yinlarning boshqotirma va krossvord shakllari mavjud bo‘lib, bu ularning qiziqarliligini ta’minlaydi.

“Tetris” o‘yini haqida qiziqarli ma’lumotlar
• “Tetris”ni 1984-yilda SSSR ilmiy akademiyasining ilmiy xodimi Aleksey Pajitnov ixtiro qilgan. Uning nomini o‘ylab topishda esa, “tetramino” (to‘rtta to‘rtburchakdan tashkil topgan geometrik shakl) va “tennis” (ixtirochining sevimli sport o‘yini)ni birlashtirgan.

• “Tetris” bir necha marta turli yo‘nalishlar bo‘yicha Ginnes rekordlari kitobiga kirgan. Ulardan eng qizig‘i samolyot bortida “Tetris” o‘yinini o‘chirmagani uchun 4 oyga qamalgan erkak bo‘lgan. Rekord shunday nomlanadi: “Kompyuter o‘yini uchun eng uzoq muddatli qamoq jazosi”.

• Hech kim hech qachon ushbu o‘yinda g‘olib bo‘la olmaydi. Shu bilan birga o‘yinni to‘xtovsiz o‘ynashning ilojisi yo‘q. O‘yin ikki hafta to‘xtovsiz o‘ynalganidan keyin hisob nolga tushib qoladigan qilib ishlab chiqilgan.

• “Tetris” insonni aqlli qilishi mumkin. Bu olimlar tomonidan tasdiqlangan fakt bo‘lib, uch oy davomida kuniga 30 daqiqadan ushbu o‘yinni o‘ynagan insonlarni kuzatib borishgan. Natijalar shuni ko‘rsatadiki, ushbu o‘yin reaksiya tezligi, tanqidiy fikrlash va hisob-kitoblarni amalga oshirish qobiliyatini rivojlantiradi.

• Psixologlarning ta’kidlashicha, “Tetris” hayotdagi muammolarga tez va oson yechim topishni o‘rgatadi.

• “Appetite” ilmiy jurnalining ta’kidlashicha “Tetris” o‘yini ochofatlik hamda narkotiklarga bo‘lgan xohish va ehtiyojni kamaytirar ekan. O‘yinga berilib ketish sizni ushbu ehtiyojlardan chalg‘itadi. Ammo o‘yinni turgan holda o‘ynash tavsiya qilinadi. O‘tirib o‘ynash sog‘liq uchun zararli hisoblanadi.

Guljahon Sanjarbekova tayyorladi