Бош прокуратура ҳузуридаги Департаментнинг Олмалиқ шаҳар бўлими томонидан вилоят ИИБ ходимлари билан ҳамкорликда ўтказилган тезкор тадбирда, фуқаро М.Б. фуқаро Ш.А.нинг ишончига кириб, унга Олмалиқ шаҳар, “О.” боғдорчилик-узумчилик ширкати ҳудудидаги 6 сотих ер майдонини 12 000 АҚШ доллари эвазига расмийлаштириб беришни ваъда қилиб, шундан 2 000 АҚШ долларини олган вақтида ашёвий далилар билан ушланган.

Шу каби, Департаментнинг Навоий шаҳар бўлими томонидан ИИБ ходимлари билан ҳамкорликда ўтказилган тезкор тадбирда, фуқаро А.Н. Кармана тумани, “Янгиариқ” МФЙдаги “Л.” боғдорчилик-узумчилик ширкатига қарашли 12 сотих ер майдонини фуқаро У.С. га фирибгарлик йўли билан 50 млн сўмга сотишга келишиб, шундан 47 млн сўмни олган вақтида ашёвий далиллар билан ушланган.

Департаментнинг Бухоро вилоят бошқармаси томонидан ИИБ ходимлари билан ҳамкорликда ўтказилган тезкор тадбирда, фуқаролар Э.Д. ва бошқалар Бухоро туман ҳокимлиги захирасидаги “Работиқалмоқ” МФЙдаги 5 сотих ер майдонини фуқаро Ж.Х. га фирибгарлик йўли билан сотишга келишиб, ҳужжатларини кейинчалик расмийлаштириб беришни ваъда қилиб, эвазига 3 500 АҚҳ долларини олган вақтларида ашёвий далиллар билан ушланганлар.

Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

• Бухоро
• Departament
• ИИБ
• Навоий
• Toshkent viloyati