Anonymous хакерлари Россия Президенти Владимир Путинга қарши уруш очди. Хакерларнинг сўзларига кўра, улар аллақачон Россия Мудофаа вазирлиги мансабдор шахсларининг электрон почта манзиллари ва паролларини бузиб, оммага ошкор қилган ва энди Путин ҳамда шерикларининг барча “кирдикорларни” шахсан ошкор этиш ниятида. Хакерлар Путиннинг истеъфосини талаб қилмоқда.

Anonymous хакерлар гуруҳининг Россия президенти Владимир Путинга шахсан йўлланган мурожаатни ёзиб олинган. Улар президентнинг зудлик билан истеъфога чиқишини талаб қилиб, Россия президенти учун “махсус операция” тайёрлаганликларини айтишмоқда. Anonymous тегишли видеомурожаатни Twitter’да эълон қилди.

“2018 йилда бизнинг гуруҳимиз Роскомнадзор веб-сайтини қандай бузиб кирганини эслайсизми? Жаноб Путин, Афғонистонга қандай мағлуб бўлганингиз ёдингиздами? Эндиликда биз Россия Мудофаа вазирлиги маълумотларини ошкор қилдик. Аввал почта ва пароллар мавжуд эди, ҳозир эса бу маълумотлар базаси twitter тармоғида очиқ. 

Сизнинг Финляндия ва Швецияга таҳдид қилишга уринишларингиз шармандалик. Бу мамлакатлар NATO’га қўшилса, таҳдид қилишингиз мумкин. Бугун биз Федерал монополияга қарши хизмати, Кремль, “Russia Today” веб-сайтлари ва бошқа рус амалдорларига тегишли веб-сайтларни ишдан чиқардик”, – дейилади мурожаатда.

Бундан ташқари, хакерлар кўп йиллар давомида яширилган маълумотларни нашр этиши ҳақида хабар берди. Anonymous бу маълумот Путин ва унинг “бузуқ қўғирчоқлари” учун қаттиқ зарба бўлишини таъкидлаган.

“Сиз ёлғон гапираётган, жамиятдан яширмоқчи бўлган ахлоқсизликни аниқлашимиз фақат вақт масаласидир. Биз парда ортидаги ҳар бир детални кўрсатамиз. Украина халқининг ҳуқуқларини тиклашни талаб қиламиз. Истеъфога чиқинг”, – дея қўшимча қилинган.

Шунингдек, хакерлар Anonymous’нинг барча аъзоларини “Владимир Путиннинг оғзини ўз пуллари билан ёпишга” чақирган.
 

• Anonymus
• Путин
• Россия
• Украина