Маълумотларга кўра, Туркияда фаолияти тақиқланган Курдистон ишчилар партияси террорчи ташкилоти Анқара марказидаги Ички ишлар вазирлиги биноси яқинида содир этилган теракт учун жавобгарликни ўз зиммасига олди. Бу ҳақда террорчи ташкилотнинг баёнотига таяниб, маҳаллий нашрлар хабар бермоқда.

“Бугун соат 9:30 атрофида бизнинг “Ўлмаслар” баталонимиз отряди Туркия Республикаси Ички ишлар вазирлиги биносига қарши ҳаракатни амалга оширди. Бу ҳаракат парламентнинг очилиш кунида, парламентга жуда яқин жойда амалга оширилиши белгиланган эди”, дейилади баёнотда.

Тақиқланган партия аъзолари Ички ишлар вазирлиги биносига кириб, қўриқчини ўлдирган.
Туркия Ички ишлар вазирлиги баёнотига кўра, икки полициячи енгил жароҳат олган ва улар орасида ўлим ҳолати қайд этилмаган.

Маълумот учун, Туркияда фаолияти тақиқланган Курдистон ишчилар партияси 1978 йилда тузилган. Ташкилот Туркия, АҚШ ва Европа Иттифоқида террорчи сифатида тан олинган.

Эслатиб ўтамиз, кеча, 1 октябрь куни тонгда Анқарадаги Туркия Ички ишлар вазирлигининг Хавфсизлик бош бошқармасида теракт содир этишга уриниш бўлди. Икки эркак машинада бино олдига борган. Улардан бири ўзини портлатиб юборган, иккинчи террорчи отиб ўлдирилган.

• ИИВ
• Теракт
• Туркия