Арманистонда ҳокимиятни куч билан эгаллаб олишга уринганликда ҳамда бош вазир ва ҳукумат аъзоларига суиқасд уюштирганликда гумонланиб, саккиз киши ҳибсга олинди. Бу ҳақда "Armenpress" агентлиги хабар берди.

Қайд этилишича, дастлабки тергов давомида ўтказилган далилий ва бошқа ҳаракатлар натижасида “Салибчилар” ҳарбий-ватанпарварлик жамияти аъзолари бир-бирлари билан ўзларида сақланаётган қурол ва ўқ-дориларни жиноят қуроли сифатида қўллаш орқали ҳукумат ваколатларини эгаллаб олиш тўғрисида олдиндан ўзаро келишувга эришганлари маълум бўлган.

Шунингдек, қўлга олинганлар Конституцияда кўзда тутилмаган тартибда ҳукумат ваколатларини ўзлаштириб, ҳокимиятни куч билан эгаллашга тайёрланаётгани аниқланган.

“Кўздан кечириш чоғида ўқотар қуроллар, қурол-яроғлар, ўқ-дорилар, пневматик тўппончалар, ўқ ўтказмайдиган жилетлар, телекоммуникация воситалари, компьютерлар, турли ёзув ва ҳужжатлар бўлган дафтарлар топилди”, – дейилади хабарда.

Арман матбуотининг аниқлик киритишича, ҳибсга олинганлар орасида Арманистон бош вазири Никол Пашинян ҳаётига суиқасд қилишда айбланаётган “Эркрап” кўнгиллилар уюшмаси раисининг собиқ ўринбосари Алберт Базеян ҳам бор.

Ҳозирда ҳибсга олинганлар устидан тергов давом этмоқда.

• Арманистон
• Пашинян
• суиқасд