“АрМИ-2022” ўйинларида муваффақиятли иштирок этган ҳарбийлар тақдирланди. Бу ҳақида Мудофаа вазирлиги матбуот хизмати хабар бермоқда.

Кеча, 17 сентябрь куни Тошкент шаҳридаги “Ғалаба боғи” ёдгорлик мажмуаси Амфитеатрида “АрМИ-2022” ўйинларида муваффақиятли иштирок этиб, Ўзбекистон байроғини юқори кўтарган ҳарбий хизматчиларни тантанали тақдирлаш маросими бўлиб ўтди.

Унда Ўзбекистон Республикаси Президенти Администрацияси ва Вазирлар Маҳкамаси вакиллари, Олий Мажлис депутатлари, вазирлик ва идоралар, давлат ва жамоат ташкилотлари раҳбарлари ҳамда оммавий ахборот воситалари ходимлари иштирок этди.

Жорий йилнинг 15-27 август кунлари йилнинг энг нуфузли ҳарбий мусобақаларидан бири бўлган “АрМИ–2022” Халқаро армия ўйинларида Ўзбекистон вакиллари 7 та олтин, 10 та кумуш, 5 та бронза медалларига эга бўлган эди. Шунингдек, 22 та шахсий ва жамоавий рекорд натижалар қайд этилиб, 37 давлат ичида умумжамоа ҳисобида фахрли иккинчи ўринни эгаллаган эди.

Тадбирда вазирлик ва идоралар, давлат ва жамоат ташкилотлари раҳбарлари ҳар бир йўналиш бўйича навбати билан саҳнага чиққан ҳарбий жамоаларнинг ҳар бир аъзосини қутлаб, пул мукофотларини топширишди. Яъни, ғолиб ва совриндор бўлган ҳарбий хизматчилар лавозим маошларига мос равишда ўн, олти ва уч баравари миқдорида пул мукофоти ҳамда бир поғона юқори малака тоифалари билан рағбатлантирилди.

Шунингдек, маросим давомида Халқаро армия ўйинларида юқори натижаларга эришган бир гуруҳ ҳарбий хизматчиларга муддатидан олдин навбатдаги ҳарбий унвонлар топширилди.

• Ҳарбий
• armiya