Ўзбекистон Республикаси президенти Шавкат Мирзиёев Бирлашган Араб Амирликлари президенти Шайх Муҳаммад Ол Наҳаённинг таклифига биноан расмий ташриф билан Абу-Даби шаҳрида бўлиб турибди.

Бугун, 14 январь куни Ўзбекистон раҳбари “Абу-Даби барқарор ривожланиш ҳафталиги” халқаро саммитининг очилиш маросимида ҳамда барқарор ривожланиш соҳасида Шайх Зоид номидаги мукофотни топшириш маросимида иштирок этди.

Тадбирда Амирликлар президенти Шайх Муҳаммад Ол Наҳаён, Озарбайжон Республикаси президенти Илҳом Алиев, Қозоғистон Республикаси президенти Қосим-Жўмарт Тўқаев, Малайзия бош вазири Анвар Иброҳим, Нигерия президенти Бола Тинубу, Руанда президенти Пол Кагаме, Сейшел ороллари президенти Уовел Рамкалаван, Уганда президенти Ёвери Мусевени ҳамда бошқа хорижий давлат ва ҳукуматлар раҳбарлари ҳам қатнашдилар.

Олий мартабали меҳмонларни БАА раҳбари кутиб олгач, биргаликда суратга тушилган.

Абу-Даби барқарор ривожланиш ҳафталиги – бу 2008 йилда БАА ҳукумати ва “Masdar” компанияси томонидан барқарор ривожланиш соҳасидаги глобал муаммоларни ҳал этиш учун ташкил этилган халқаро платформадир. Форумнинг мақсади жаҳонда барқарор тараққиётни жадаллаштириш, иқтисодий, ижтимоий ва экологик ривожланишга кўмаклашиш, озиқ-овқат ва сув хавфсизлигини таъминлаш, энергия тежамкорлиги ва карбонсизлантиришни илгари суришдан иборат.

Бу галги саммит кун тартибига “яшил” иқтисодиёт соҳасида барқарор тараққиётни таъминлаш, инновациялар ва янги технологияларни жорий этиш, энергетика ва озиқ-овқат хавфсизлиги бўйича минтақавий ҳамкорликни мустаҳкамлаш масалалари киритилган.

Форум доирасида Амирликлар асосчиси – марҳум Шайх Зоид Ол Наҳаён номи билан аталувчи барқарор ривожланиш соҳасидаги ютуқлар учун мукофот билан тақдирлаш маросими ҳам ўтказилади. Бу галги мукофотнинг “Глобал ўрта мактаблар” номинациясида Тошкент шаҳридаги президент мактаби ғолиб деб топилган.

Мукофотни Бирлашган Араб Амирликлари резиденти Шайх Муҳаммад бин Зоид Ол Наҳаён топширган.

Шавкат Мирзиёев мактаб вакиллари билан учрашиб, уларни ғалаба билан қизғин табриклаган.

• БАА
• Шавкат Мирзиёев
• Ташриф
• tadbir