Ўзбекистонлик чарм-қўлқоп устаси Баҳодир Жалоловнинг Токио-2020 олимпиадасидаги ғалабаси ҳақида «Енгилмас. Токиога йўл» номли фильм суратга олинади.

Бу ҳақда Ахборот ва оммавий коммуникациялар агентлиги Сурхондарё вилояти ҳудудий бошқармаси маълум қилган.

«Рио-2016 Олимпиадасидаги муваффақиятсизлигидан сўнг боксчи Баҳодир Жалолов қисман боксдан четлаштирилади. Аммо мураббийлар спортчини терма жамоага қайтаришга муваффақ бўлишади.

Баҳодир яна машғулотларга киришади ва қисқа вақт ичида бир қанча муҳим турнирларда ғалаба қозониб, нафақат Осиё, балки жаҳон чемпиони бўлади.

Шунингдек, фильмда анти қаҳрамонлар ҳам бор: турнир ҳайъатига бир амалдор кейинги Олимпиадада америкаликларнинг ғалабасини таъминлаш топшириғини беради.

Токио Олимпиадасида Ўзбекистон терма жамоасидан фақат Баҳодир финалга йўл олади, у ерда америкалик Торрес билан юзлашади. Турнир ҳайъати режасига кўра, у кўр-кўрона америкаликка мағлуб бўлиши керак эди. Аммо сўнгги лаҳзада маккорона режа барбод бўлади – Баҳодир Олимпиада чемпионига айланади.

Лойиҳага 300 га яқин маҳаллий ва хорижий актёрлар жалб этилади. Тасвирга олиш ишлари Тошкент, Сурхондарё, Токио, Нью-Йоркда олиб борилади», – дейилади АОКАнинг Сурхондарё ҳудудий бошқармаси расмий хабарида.

• АОКА
• Баҳодир Жалолов
• Бокс
• Кино