Трампга уюштирилган суиқасд ҳақида нималар маълум?

Пенсилвания штати полициячиларининг фикрича, АҚШнинг собиқ президенти Доналд Трампга суиқасд қилган шахс йўқ қилинган ва ҳозирда бошқа шунга ўхшаш таҳдид йўқ.

“Ҳозирча бизда бошқа таҳдид борлигига ишониш учун ҳеч қандай сабаб йўқ”, – деган штат полицияси вакили Жорж Бивенс.

Ҳуқуқ-тартибот идоралари ходимлари суиқасд уюштирган шахснинг ёлғиз ҳаракат қилганига ишонадими ёки йўқми деган тўғридан-тўғри саволга полиция вакили бу ҳақда гапиришга ҳали эрта эканлигини айтган.

Эслатиб ўтамиз, Доналд Трамп шанба куни Пенсилваниядаги отишма туфайли оммавий нутқини тўхтатди. Видеотасвирларда сиёсатчининг қўриқчилари қўл остида олиб кетаётгани, қулоғи қонга беланганлиги акс этган. Кейинчалик Трамп қулоғидан жароҳат олганини ва кўп қон йўқотганини айтган. АҚШ махфий хизмати воқеа жойига бир неча бор ўқ узган гумонланувчини йўқ қилганини айтди. Ўқ отиш пайтида томошабинлардан бири ҳалок бўлган, яна иккитаси яраланган.

• АҚШ
• Президент
• Трамп
• суиқасд