Бош прокуратура ҳузуридаги Департаментнинг ҳудудий бўлимлари томонидан электр ва табиий газ тармоқларига ноқонуний уланиш ҳолатлари фош этилмоқда.

Хусусан Андижонда «Н.Г.» МЧЖ раҳбари М.Ш. ва бошқалар корхонанинг ишлаб чиқариш цехини ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, 1 млн. кВт/с электр энергиясидан ноқонуний фойдаланганликлари аниқланган.

Шу каби, Пахтаободда «Ў.C.» МЧЖ раҳбари Т.У. ва бошқалар “Маърифат” МФЙ ҳудудидаги ғишт ишлаб чиқариш биносини ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, 402,9 минг кВт/с электр энергиясидан ноқонуний фойдаланганликлари аниқланган.

Балиқчи туманида фуқаро М.М. ўзининг хонадонида ташкил этган яширин ёғ ишлаб чиқариш цехини ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, 276,1 минг кВт/с электр энергиясидан ноқонуний фойдаланганликлари аниқланган.

Шунингдек, Андижон туманида эса “Э.Ш.» ва“М.Д.» оилавий корхоналари раҳбарлари ушбу корхоналарнинг ишлаб чиқариш цехи ва чойхонани ҳеч қандай ҳужжатсиз умумий фойдаланишдаги электр тармоғига ўзбошимчалик билан улаб, 159,7 минг кВт/с электр энергиясидан ноқонуний фойдаланганликлари аниқланган.

Бундан ташқари, Навоий вилоятида «Б.З.» МЧЖга қарашли иссиқхонада табиий газ сарфи бўйича маълумотларни электрон тарзда газ таъминоти корхонаси дастурига жўнатишга мўлжалланмаган газ ҳисоблаш ускунасидан фойдаланиб, жами 72 минг куб табиий газдан ноқонуний фойдаланганлиги аниқланган.

Ушбу қонунбузилиш ҳолатлари оқибатида, давлат ва жамият манфаатларига 934,1 млн. сўм зарар етказилган.

Маълум қилинишича, мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.

• Departament
• Электр энергияси
• Газ