Бу янги тизим нафақат бу йилги, балки олийгоҳни тугатганига 3 йил бўлмаган битирувчилар учун ҳам амал қилади.

Ўзбекистонда олий таълим муассасалари битирувчиларини ишга олган тадбиркорларга 2 йиллик имтиёзли давр билан 7 йил муддатга 5 млрд сўмгача кредит ажратилади. Бу ҳақда Адлия вазирлиги ахборот хизмати хабар қилди.

ОТМни битирганига 3 йилдан ошмаганларни ишга олган тадбиркорларга 18 фоизли ставкада 5 млрд сўмгача кредит ажратилади. Бунда ҳар 1 млрд сўмгача бўлган маблағ учун камида бир битирувчини ишга олиш шарт. 2 йил ичида меҳнат шартномаси бекор бўлса, фоиз тижорий ставкага ўзгартирилади.

Кредит ишлаб чиқариш ва хизмат кўрсатиш соҳасидаги лойиҳаларга асосий воситалар сотиб олиш ҳамда айланма маблағларни тўлдириш учун ажратилади.

Тадбиркор унинг имтиёзли кредит олишига сабаб бўлган битирувчи ўртасида 2 йил давомида меҳнат шартномаси бекор бўлган тақдирда, кредит фоизи меҳнат шартномаси бекор бўлган санадан тижорат ставкасига ўзгартирилади.

Бироқ, бундан ушбу ходим ўрнига 1 ой муддатда бошқа битирувчи ишга қабул қилинган ҳоллар мустасно.

Шунингдек, битирувчилар ўртасида энг яхши стартап ва инновацион лойиҳалар танлови ташкил этилади. Танлов ғолибларига камида 2 нафар битирувчини ишга олиш мажбурияти билан 1 млрд сўмгача грант ажратилади.

• Imtiyoz
• Кредит
• ОТМ