Кеча, 8 январь куни Бразилиянинг собиқ президенти Жаир Болсонаро тарафдорлари полиция билан тўқнашиб, Бразилиядаги ҳукумат биноларига бостириб киришди. Улар парламент биноси, Федерал Олий суд ва давлат раҳбарининг ишчи қароргоҳини вайрон қилган.

Ҳалок бўлганлар ва жароҳатланганлар ҳақида ҳозирча маълумотлар йўқ.

Кўплаб халқаро сиёсий арбоблар намойишчиларнинг ҳаракатларини қоралаб, Луиз Инасио Лула да Силва ва унинг ҳукуматини қўллаб-қувватлашларини маълум қилган.

Қайд этилишича, Болсонаро тарафдорлари октябрдаги президентлик сайловлари натижаларига қарши чиқди. Бразилия байроқлари ва сариқ-яшил либос кийган намойишчилар парламент, Федерал Олий суд бинолари ва давлат раҳбарининг ишчи қароргоҳи ҳисобланган Планальто саройининг ойналарини синдирган. Дам олиш кунларида бўш турган маъмурий бинолар қўриқчилари қоидабузарларга қарши тура олмаган.

Бразилия пойтахти федерал округидан келган ҳарбий полиция вертолёти намойишчиларга қарата кўздан ёш оқизувчи газли гранаталарни улоқтирган.

Тартибсизликлар бошланганидан бир неча соат ўтгач, Бразилиядаги полиция бўлинмалари намойишчиларни ўзлари эгаллаб олган ҳукумат биноларидан чиқариб юборишга муваффақ бўлди. Дастлаб 30 нафар намойишчи ҳибсга олингани ҳақида хабар берилган эди. Кейинроқ Globo телеканали тартибсизликларда қатнашган 150 нафар маҳбус ҳақидаги маълумотларни эълон қилди.

Бразилия расмийларининг муносабати

Лула да Силва тарафдорлари бош прокурордан Бразилияда федерал хавфсизлик кучларидан фойдаланишга рухсат беришни сўради.

Бразилия президенти мамлакат пойтахтида якшанба кунги тартибсизликларда иштирок этган фуқароларни аниқлаш ва уларни жазолашга ваъда берди. У тартибсизликлар муносабати билан вазирлар иштирокида фавқулодда йиғилиш ўтказган.

Январь ойи охиригача Бразилияда фавқулодда ҳолат жорий қилинган

Бразилия бош прокуратураси ҳукумат манфаатларини ҳимоя қилиб, пойтахт жамоат хавфсизлиги бошқармаси собиқ раҳбари Андерсон Торресни ҳибсга олишни талаб қилди.

Бразилия бош прокурори Аугусто Арас пойтахт федерал округи прокуратурасидан Бразилиядаги тартибсизликлар юзасидан жиноий иш қўзғатишни сўраган.

Халқаро ҳамжамиятнинг муносабати

Европа Кенгаши раҳбари Шарль Мишель ва Европа Иттифоқи ташқи сиёсат бўйича масъул Хосеп Боррел Европа Иттифоқи Бразилияда намойишчиларнинг парламент ва ҳукумат биноларини эгаллаб олишини қоралаши ва мамлакатнинг қонуний равишда сайланган президенти Луиз Инасио Лула да Силвани тўлиқ қўллаб-қувватлашини билдиргани..

Аргентина президенти Альберто Фернандес халқаро ҳамжамиятни Бразилиядаги тартибсизликларни қоралашга чақирган.

Британия ташқи ишлар вазири Жеймс Клеверлининг айтишича, унинг мамлакати Бразилиядаги ҳукуматга қарши намойишлар фонида Лула да Силвани тўлиқ қўллаб-қувватлайди.

АҚШ президенти Жо Байден Бразилиядаги вазиятни даҳшатли, деб атади. АҚШ Давлат котиби Энтони Блинкен эса намойишларни зудлик билан тўхтатишга чақирди.

Чили раҳбари Габриэль Борич Бразилиянинг собиқ президенти Жаир Болсонаро тарафдорлари уюштирган тартибсизликларни қоралаб, буни “демократияга қарши қўрқоқларча ҳужум” сифатида баҳолади.

Венесуэла президенти Николас Мадуро собиқ президент Жаир Болсонаро тарафдорларини неофашистларга қиёслади.

Ташқи ишлар ва халқаро ҳамкорлик вазири, Италия бош вазир ўринбосари Антонио Тажани Бразилиядаги президентлик сайлови натижалари ҳурмат қилиниши кераклигини айтди.

Франция етакчиси Эммануэль Макрон пойтахтдаги тартибсизликлар муносабати билан Лула да Силвани қўллаб-қувватлашини билдирди.

Мексика ташқи ишлар вазири ва Куба президенти Мигель Диас-Канель ҳам тартибсизликларни қоралаган.

Эквадор раҳбари Гильермо Лассо намойишларни демократияга ҳурматсизлик, деб атади.

Колумбия президенти Густаво Петро Бразилиядаги воқеалар муносабати билан Америка Давлатлари Ташкилотининг (OAS) шошилинч йиғилишини ўтказишга чақирди ва буни фашизмнинг демократияга зарбаси сифатида баҳолади. OAS бош котиби Луис Алмагро Болсонаро тарафдорларининг давлат муассасаларига ҳужумларини “фашистик” руҳ билан йўғрилганини таъкидлади.

• Braziliya
• Tartibsizlik