27 март куни ижтимоий тармоқларда Чорвоқ сув омборида сув сатҳининг пасайиши оқибатида юзага чиқиб қолган одам суяклари акс этган видео тарқалди. Унда ушбу суяклар бу ерга чўмилгани келиб чўкиб кетган одамларга тегишли эканини тахмин қилинган.

Бўстонлиқ туман прокуратураси томонидан олиб борилган терговга қадар текширув давомида сув омборининг ушбу қирғоғида бундан бир неча йиллар аввал Бўстонлиқ туманидаги «Болодала» маҳалласи аҳолисининг «Безгати боғ» қабристони бўлгани, Чорвоқда сув сатҳининг кўтарилиши натижасида қабристон сув остида қолиб кетгани аниқланган.

Айни пайтда сув омборида сув сатҳи пасайгани сабабли қабристондан одам суяклари юзага чиқиб қолган.

Маълум қилинишича, Чорвоқ сув омборида ҳар йилнинг бошида сув сатҳи пасайиши натижасида бундай ҳолатлар кузатилиб туради.

Қайд этилишича, ҳозир мазкур ҳолат юзасидан прокуратура томонидан олиб борилаётган терговга қадар текширув ҳаракатлари натижаси бўйича қонуний қарор қабул қилиниши таъминланади.

• Бош прокуратура
• Chorvoq