Франциянинг ПСЖ клуби УEФА Чемпионлар Лигаси финалида эришган йирик ғалабаси эвазига 25 млн евро мукофот пули қўлга киритди. Парижликлар турнирдаги умумий иштироки учун эса жами 146 млн евро даромад олди. Турнир давомида клублар ўз натижаларига қараб УEФА томонидан белгиланган мукофот пулларини қўлга киритишди. Мукофотлар қуйидагича тақсимланган:

- гуруҳ босқичидаги ҳар бир ғалаба учун — 2,1 миллион евро;

- ҳар бир дуранг учун — 700 минг евро;

- 1/8 финалга чиқиш — 12,5 миллион евро;

- чорак финал — 15 миллион евро;

- ярим финал — 18,5 миллион евро;

- финалдаги ғалаба — 25 миллион евро;

Бундан ташқари, клублар УEФА томонидан ажратиладиган маркетинг даромадлари ва трансляция ҳуқуқларидан ҳам фойда кўради. Финалда парижликларга 5:0 ҳисобида мағлуб бўлган “Интер” эса турнирдаги иштироки учун жами 136,6 млн евро ишлаб топди. Ушбу суммага финалга чиққани учун олинган 15 млн евро ва олдинги босқичлардаги барча мукофот пуллари киради. “Арсенал” ЕЧЛ ортидан энг кўп даромад қилган 3-жамоага айланди. Лондонликлар турнирдаги иштироки эвазига 117 млн евро қўлга киритган. Шунингдек, ПСЖ УEФА Суперкубоги доирасида Лондонда бўлиб ўтадиган баҳсда иштирок этади ва бу ўйин учун яна 4 миллион евро мукофот пули ишлаб олади.

Маълумот учун, Чемпионлар Лигаси финали кеча, 31 май куни Мюнхен шаҳридаги “Allianz Arena” стадионида бўлиб ўтди. Унда ПСЖ “Интер”ни 5:0 ҳисобида мағлуб этди. Бу Париж клуби тарихидаги илк Чемпионлар Лигаси кубоги ҳисобланади.

• Интер
• PSJ
• ЕЧЛ
• chempionat