Париж-2024 ёзги Олимпия ўйинлари чемпиони, дзюдочимиз Диёра Келдиёрова мусобақада курашган кимоносини Халқаро Олимпия қўмитасининг музейига совға қилди.

Шунингдек, ўйинларнинг асосий матбуот марказида ушбу тадбирга бағишланган анжуман ўтказилган.

Қайд этилишича, ушбу тадбирда Ўзбекистон Республикаси Спорт вазири Адҳам Икрамов, МОҚ Бош котиби Ойбек Касимов, шунингдек, Халқаро Олимпия қўмитаси (ХОҚ) ва Халқаро дзюдо федерацияси мутасаддилари қатнашишган.

Эътиборлиси, Келдиёрова ёзги Олимпия ўйинларида олтин медалга сазовор бўлган илк ўзбек аёл спортчисига айланди.

Ўз навбатида, Келдиёрова тарихий чемпионликка эришганидан мамнунлиги, кимониси ХОҚ музейидан жой олаётгани у учун шараф эканини қўшимча қилган.

Тадбир якунида ташкилотчилар ҳам Диёрага ўзига хос совға тайёрлашди.

Бундан ташқари, спортчининг дзюдо оламидаги кумири, икки карра Олимпиада чемпиони, франциялик Кларисс Агбенену ҳамюртимизни тарихий ғалаба билан қутлаб, унга ўзининг илиқ тилакларини йўллаган.

• Олимпиада
• Parij