Доҳада ўтказилаётган 36-жаҳон чемпионатининг биринчи куни терма жамоамиз учун омадли келди.

-60 кг вазн тоифасида Ўзбекистон шарафини ҳимоя қилган Дилшодбек Баратов финалга қадар мағлубиятсиз етиб келиб, фаолиятида илк бор жаҳон чемпионатининг кумуш медали ҳамда қимматли 1 400 рейтинг очкосига эга бўлди.

У ҳал қилувчи финал беллашувида испаниялик Франсиско Гарригосга имкониятни бой бериб қўйди. Гарригос 1/2 финалда япониялик Олимпиада чемпиони Такатони чиройли усул билан мағлуб этган эди.

Баратов дастлаб мўғилистонлик Ариунболд Энхтайвиндан Тошкентдаги жаҳон чемпионати ярим финали, ундан сўнг жаҳон чемпиони, икки карра Олимпиада совриндори қозоғистонлик Елдос Сметовдан бронза медали учун баҳсдаги мағлубиятлар учун реванш олди.

1/4 финалда марокашлик Йонес Саддики, 1/2 финалда бельгиялик Йорре Верстрайтендан устун келган эди.

Ўз навбатида, бугун дунёнинг 100 га яқин давлати дзюдочилари иштирокида ўтаётган йилнинг энг нуфузли мусобақасида иккинчи кунги беллашувлар ташкил этилади.

Ўзбекистонлик қуйидаги дзюдочилар -52 ва -66 кг вазн тоифаларида медаллар ҳамда рейтинг очколари учун татамига чиқадилар:

-52 кг: Диёра Келдиёрова – Эстрелла Лопез Шерифф /Селин Баба

-52 кг: Сита Кадамбаева – Габриела Домитрова

-66 кг: Муҳриддин Тиловов – Вейл Эззине

-66 кг: Сардор Нуриллаев – Абрек Нагучев.

• Дзюдо
• Жаҳон чемпионати
• Ўзбекистон