31°
Кечаси 18°
Президентининг суд мустақиллигини кучайтириш ва судьялар ҳамжамияти органлари фаолиятини такомиллаштиришга доир фармони қабул қилинди. Ҳужжат “Ўзбекистон – 2030” стратегиясида белгиланган вазифаларни амалга оширишга қаратилган.
Фармонга кўра:
Судьялар ҳамжамияти органлари фаолиятида судьяларнинг ўзини ўзи бошқариш тамойили ва суд мустақиллигига оид халқаро стандартлар жорий этилади.
Судьялик лавозимларига номзодларни дастлаб 5 йил муддатга, кейинчалик муддатсиз тайинлаш тартиби белгиланади.
Суд раислари ва уларнинг ўринбосарларини очиқ танлов орқали танлаш тизими йўлга қўйилади.
Судьянинг “ҳалоллик”, “касбий лаёқатлилик” ва “одоб қоидаларига риоя этиш” мезонлари қонун даражасида белгиланиши кўзда тутилади.
Кенгаш ва Олий суд таркибини шакллантириш жараёнида судьялар ҳамжамияти органлари иштироки кенгайтирилади. Кенгашнинг доимий асосда фаолият юритувчи судьялари Олий суд, вилоят судлари ҳамда туманлараро ва туман судлари судьялари орасидан шакллантирилади.
Судьялар малака ҳайъатлари ва Судьялар олий малака ҳайъати томонидан судьялик лавозимларига номзодлар бўйича хулосалар тақдим этиш тартиби қонунчиликка киритилади. Кенгаш ва Судьялар олий малака ҳайъатининг қўшма йиғилиш тартиби бекор қилинади.
Кенгаш раисига интизомий ишларни қайта кўриб чиқиш бўйича тақдимнома киритиш ҳамда Кенгаш тузилмаси ва штат жадвалини мустақил тасдиқлаш ваколати берилади.
2025 йил 15 декабрдан бошлаб Кенгаш расмий сайтида бўш лавозимлар ва судьялик лавозимларига номзодларни танлаш жараёнига оид маълумотлар очиқ эълон қилиб борилади. Номзодларни танлаш ва баҳолаш жараёнини рақамлаштириш, шу жумладан сунъий интеллектдан фойдаланиш чоралари белгиланган.
Кенгашга қўшимча 4 та штат бирлиги ажратилади, умумий штат сони 32 тани ташкил этади. Фармонда суд мустақиллигига оид қонунчиликни халқаро стандартлар асосида қайта кўриб чиқиш, судьяларга нисбатан интизомий жазо қўллаш тартибини шаффофлаштириш бўйича топшириқлар берилган.
Шунингдек, суд тизимида гендер тенгликни таъминлаш мақсадида Одил судлов академиясига қабул жараёнида хотин-қизлар учун квота жорий этилади. Аёл судьялар ассоциациясини ташкил этиш ташаббуси маълумот учун қабул қилинган.
Фармон ижросини таъминлаш учун масъул этиб Судьялар олий кенгаши раиси белгиланган, назорат эса Президент Администрацияси томонидан амалга оширилади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
