Тошкент метросида кафт изларига асосланган MyID Palm тўлов тизими иш бошлади. Йўловчининг биометрик идентификацияси учун кафтни сканерлаш технологияси қўлланилади. Тизим маҳаллий ишлаб чиқувчилар томонидан Транспорт вазирлиги, ATTO жамоат транспорти тўлов хизмати ва Octobank билан ҳамкорликда яратилган.

Ишлаб чиқувчилар фойдаланувчи маълумотларини ишончли ҳимоя қилишни ваъда қилмоқдалар. Бу технология рухсатсиз кириш ва биометрик профилларни сохталаштиришни бартараф этади, дея таъкидлади Uzinfocom.

MyID Palm сканерлари Чилонзор линиясининг 12 та ерости бекатида, яъни Олмазордан Буюк Ипак йўлигача бўлган қисмида синов режимида ишламоқда. Яқин келажакда тизим қамровини барча станцияларгача кенгайтириш режалаштирилган.

Агар сизда ATTO транспорт картаси ва хизмат иловаси ўрнатилган смартфон бўлса, тизимдан фойдаланишингиз мумкин. Бунинг учун сиз биометрик профиль яратишингиз ва улар мавжуд бўлган метро станцияларидан биридаги маълумот киоскида кафтларингизни сканерлашингиз керак.

• Метро
• Ўзбекистон