Эрон ҳукумати мамлакат хавфсизлик хизматлари пойтахт Теҳронда ИШИД жангарилари томонидан тайёрланаётган кенг кўламли терактнинг олдини олганини маълум қилди. Бу ҳақда маҳаллий нашрлар хабар берди.

ОАВнинг разведка расмийларига таяниб хабар беришича, Теҳронда “гавжум жойларда бир вақтда портлаши керак бўлган” 30 та бомба зарарсизлантирилган.

Шунингдек, мамлакатда ИШИДга алоқадор 28 нафар террорчи қўлга олингани хабар қилинган.

Ахборот агентлигининг қайд этишича, фитна иштирокчиларидан баъзилари ИШИД аъзолари, бошқалари эса аввалроқ Сурия, Афғонистон, Покистон ва Ироқ Курдистонидаги жангари гуруҳлар билан алоқадор бўлган.

“Операциялар давомида террорчилардан қурол-яроғ ва жиҳозлар, жумладан, жуда кўп миқдорда портловчи моддалар, бомбалар, портловчи қурилмалар учун материаллар, портловчи мосламалар учун 100 дона капсуладан иборат пакет, тўппонча ва ўқлар, турли интеллектуал ва сунъий йўлдош телекоммуникация қурилмалари, ҳарбий техникалар, худкуш камарлар, Ироқ Курдистонида қўлланадиган модемлар, шунингдек, хорижий валюталар мусодара қилинди”, – деди махсус хизматлар вакиллари журналистларга.

Шу билан бирга, разведка идоралари бу сафарги аксилтеррор операциясини режалаштириш ИШИД террорчиларининг бошқа операцияларига нисбатан “жуда мураккаб” бўлганини айтишди.

Операцияда Эрон разведка хизматининг икки нафар ходими яраланганлиги айтилмоқда.

• Eron
• Tehron
• bomba
• razvedka