Исроил маълумотига кўра, Эрон ҳужумининг биринчи тўлқинида 40 тагача ракета Ҳайфа порт шаҳрига йўналтирилган. Кейин баллистик ракеталар ва учувчисиз самолётлар ёрдамидаги иккинчи амалиёт кузатилган. Масалан, бир ракета Тел-Авив яқинидаги Бат-Ям шаҳридаги турар-жой биносига келиб тушиши оқибатида тўрт киши ҳалок бўлган. Ўнлаб одам вайрона остида қолган, икки юзга яқин киши жароҳатлангани маълум қилинди.

AFP маълумотида ҳалок бўлганлар орасида ўн ёшли бола ҳам бўлгани келтирилган. Times of  Israel эса вайроналар орасида 8 ёшли қизчанинг жасади топилганини ёзмоқда.

Айни пайт Теҳрондаги нишонлар томон ҳужум давом этяпти. Исроил армияси Эрон пойтахтида ядровий инфратузилма масканлари ва нефть омборларига ҳужум қилинганини тасдиқлади. Мудофаа вазири ижтимоий тармоқда “Теҳрон ёнмоқда” дея изоҳ қолдирган.

Гувоҳлар Яман пойтахти Сана шаҳрида ҳам портлаш содир бўлганини айтган. Исроил бу гал Эрон томонидан қўллаб-қувватланиши тахмин қилинадиган Ҳусийлар олий ҳарбий қўмондонини нишонга олган бўлиши мумкин.           

• Eron
• Havo hujumi
• Isroil