“Демократик партияга яқин бўлган 100 дан ортиқ ташкилотлар 14 июнь куни, яъни Трампнинг туғилган кунида, бутун АҚШ бўйлаб президентга қарши оммавий норозилик намойишлари уюштиришни режалаштирмоқда”, – дея хабар бермоқда Ахios.

Хабар берилишича, бир кунлик ушбу тадбир “No Kings” (“Қирол йўқ”) деб аталади. Акциянинг мақсади авторитаризмни рад этиш ҳисобланади.

Ташкилотчилар мазкур акцияда бутун мамлакат бўйлаб миллионлаб одамлар қатнашишига умид қилмоқда.

Бундан ташқари, Колумбия, Малави, Италия, Португалия, Германия ва Буюк Британияда ҳам норозилик намойишлари ўтказилиши режалаштирилган.

Доналд Трамп эса ўз туғилган кунини нишонлаш учун Вашингтонда кўп миллион долларлик ҳарбий парад ўтказмоқчи. 14 июнь куни нафақат Трампнинг туғилган куни, балки АҚШ Қуролли кучлари ташкил этилганининг 250 йиллиги ҳам нишонланади.

Президент Трамп шанба куни бўлиб ўтадиган парад чоғида юзага келиши мумкин бўлган ҳар қандай норозилик намойишлари “жуда катта куч билан” бостирилишини айтди.

• АҚШ
• Намойиш
• Трамп