Интернет ижтимоий тармоқларида фуқарони уйидан чақириб, остонада калтаклаб кетилганлиги ҳолати юзасидан тарқалган видеомурожаат бўйича Фарғона вилояти ИИБ маълумот берди.

Аниқланишича, жорий йилнинг 12 сентябрь куни фуқаро Н.А видеомурожаатдаги М.А.нинг яшаш уйи яқинида ўзаро келишмовчилик сабабли унинг юз қисмига қўли билан уриб, тан жароҳати етказган.

Мазкур ҳолат шу куннинг ўзида Марғилон шаҳар ИИБ томонидан тегишли тартибда рўйхатга олиниб, терговга қадар текширув ҳаракатлари олиб борилган.
Судга оид тиббиёт экспертизасининг 2023 йил 21 сентябрь кунги хулосасига кўра, М.А.нинг олган жароҳати ўртача оғир шикастлар тоифасига киришлиги кўрсатилган.

Мазкур ҳолат юзасидан Жиноят кодексининг 105-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.

Фарғона вилояти ИИБ ҳар қандай қонунбузилиш ҳолатларига жавобгарлик муқаррар эканлигини маълум қилади.

• Фарғона
• ИИБ