Фарғонада завод газдан узилишига қарши норозилик билдирганлар қамалди. Ҳолат юзасидан вилоят ИИБ ахборот хизмати изоҳ берди.

Аввалроқ, ижтимоий тармоқда Фарғонанинг Ўзбекистон туманидаги “Шўрсув цемент” ишчилари мурожаат билан чиқиб, заводда газ узиб қўйилгани ортидан ишсиз ва даромадсиз қолиб кетгани айтилган видеолар тарқалган эди.

Маълум бўлишича, жорий йилнинг 29 ноябрь куни аҳолига табиий газни кўпроқ етказиб бериш мақсадида Ўзбекистон тумани, Шўрсув МФЙда жойлашган “ALBUS” гипс ишлаб чиқарувчи заводи олдиндан тузилган шартнома шартларига биноан туман газ идораси томонидан газ қувуридан узилган.

Жорий йилнинг 6 декабрь куни заводнинг 20 нафар ишчилари юқоридаги ҳолатни нотўғри талқин қилиб, “ўзбошимчалик” билан жамоат тартибига қарши нозорилик уюштирган.

Мазкур ҳолат юзасидан Ўзбекистон туман ИИБ томонидан заводнинг жами 7 нафар ишчиларига нисбатан Маъмурий жавобгарлик тўғрисидаги кодекснинг 183-моддаси (майда безорилик) ҳамда 201-моддаси (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) билан ҳужжатлар расмийлаштирилиб, суд органига тақдим қилинган.

7 декабрь куни Жиноят ишлари бўйича Ўзбекистон туман суди куни ҳуқуқбузарларнинг 1 нафарига 10 сутка, 6 нафарига 5 суткадан маъмурий қамоқ жазоси тайинлаган.

Бир неча кун аввал Энергетика вазири Жўрабек Мирзамаҳмудов ушбу ҳолатга изоҳ берган эди.

“Фарғонадаги ҳолатга келадиган бўлсак, яна бир бор таъкидлаб ўтамиз, бошқа алтернатив ёқилғида ишлаши мумкин бўлган барча объектлар ҳаво кескин пайтда тармоқдан узилади. Бу ерда 10 мингта, деб бироз бўрттириб гапирилган. Бу цемент ишлаб чиқариш корхонасининг 10 минг эмас, юздан сал ошиқроқ ишчилари бўлган.

Ҳамма биладики, Вазирлар Маҳкамасининг тегишли қарори бор, ғишт заводлари, янгидан қурилаётган цемент заводлар барчаси кўмир, яъни алтернатив ёқилғида ишлаши керак. Ҳозир бу заводни табиий газга ким улаган, ким рухсат берган, буни алоҳида ўрганиб чиқамиз. Лекин корхона раҳбарлари шартнома шартларига кўра вақтида огоҳлантирилган. Ишчилар билан тегишли тарғибот ишларини олиб бориши керак эди”, – деди Мирзамаҳмудов.

• Энергетика_вазирлиги
• Фарғона
• Газ