7 февраль куни Суперлига-2023 учун қуръа ташланади.

Қайд этилишича, Лига Ўзбекистон чемпионати билан параллель старт оладиган U20 Осиё кубоги келтириб чиқариши мумкин бўлган ноқулайликларга аниқ ечимлар топиш устида иш олиб боряпти.

«Режага кўра, Суперлиганинг янги мавсуми 3 март куни старт олади. «Насаф» Чемпионлар лигасида иштирок этишидан келиб чиқиб, Ўзбекистон Суперкубоги ўйини Суперлига старти олдидан эмас, балки 14 март куни бўлиб ўтиши режалаштирилган эди.

Аммо Ўзбекистон миллий терма жамоасининг март ойи учун режасидан келиб чиқиб, Суперкубок санаси яна ўзгариши мумкин. Бу ҳақда кейинроқ батафсил маълумот берилади.

7 февраль куни эса Суперлига янги мавсумига қуръа ташланади. Жараён 21:00 дан бошлаб «Спорт» телеканали орқали жонли эфирга олиб чиқилади», – дейилади хабарда.

Шунингдек, Лига U20 Осиё кубогидан келиб чиқиб, қуръа олдидан футбол жамоатчилиги эътиборини қуйидаги масалага қаратган.

Унга кўра, март ойидаги ФИФА кунларига қадар «Нефтчи», «Бунёдкор», АГМК ёки «Олимпик» футбол клублари ўзаро тўқнаш келиб қолса, катта эҳтимол билан улар иштирокидаги ўйинлар бошқа санада ўтказилади.

Мазкур жамоалар дастлабки турлар давомида уй учрашувларини бошқа клубларга қарши ўтказишига тўғри келса, мазкур беллашувлар автоматик равишда рақиб майдонига кўчирилади.

Келтирилишича, қолган барча ҳолатга қуръа жараёнида батафсил тушунтириш берилади.

• Футбол
• Ўзбекистон
• Суперлига
• ЎзПФЛ