Ўзбекистонда 1 апрелдан бошлаб газ ва электр энергияси тарифлари оширилади. Ушбу хизматлар учун олдиндан тўлов амалга оширилса, эски тарифлар аҳоли учун икки ой давомида (1 июнгача), тадбиркорлик субъектлари учун эса бир ой давомида амал қилади.

Электр энергияси ва табиий газдан фойдаланиш қоидаларига мувофиқ, тариф ўзгарган тақдирда, янги тарифлар кучга кирган кундан бошлаб:

- маиший истеъмолчилар аввалдан тўланган ҳажм учун икки ойдан ошмайдиган муддатга қўшимча тўловлардан озод қилинади;

- бошқа истеъмолчилар (жумладан, тадбиркорлар) эса бир ойдан ошмайдиган муддатга қўшимча тўловлардан озод этилади.

Бундан маълум бўладики, 1 апрелгача олдиндан тўловни амалга оширганда икки ой давомида (1 июнгача) эски тарифлар амал қилади. Аммо бу фақат ижтимоий меъёр доирасидаги истеъмол ҳажмига — 100 куб метр газ ва 200 кВт/соат электр энергиясига тааллуқлидир. Ушбу ҳажмлар ошиб кетганда, икки баравар миқдорда тариф қўлланилади.

Мисол учун, агар оила олдиндан тўловни амалга ошириб, бир ой давомида 300 кВт/соат электр энергиясидан фойдаланган бўлса, 200 кВт/соат учун тўлов 90 минг сўмни (эски тариф бўйича 450 сўм), кейинги 100 кВт/соат учун ҳам 90 минг сўмни (иккиланган тариф бўйича 900 сўм, у 1000 кВт/соатгача қўлланилади, кейин ошади) ташкил этади.

Агар олдиндан тўлов қилинмаса, май ойи учун 300 кВт/соат 220 минг сўмга (120 минг + 100 минг сўм) тушади.

• Электр энергияси
• Энергетика_вазирлиги
• Газ