Ҳиндистоннинг Карнатака штатида метапневмовирус (HMPV) билан касалланган икки ҳолат аниқланган. Бу ҳақда, Hindustan Times хабар бермоқда.

Мамлакат Соғлиқни сақлаш вазирлиги баёнотига кўра, ҳар икки ҳолат ҳам бронхопневмония билан боғлиқ. Шифохонага ётқизилган икки нафар чақалоқда метапневмовирус аниқланган. Анамнезида бронхопневмония бўлган уч ойлик қизча даволанишдан сўнг соғайган, саккиз ойлик ўғил бола эса ҳали ҳам даволанаётгани айтилмоқда.

Беморларнинг бирортаси ҳам мамлакатдан ташқарига чиқмаган. Ҳиндистон Соғлиқни сақлаш вазирлиги вирус мамлакатда фаол тарқалаётганини таъкидлаган.

Қирғизистонда метапневмовируснинг икки ҳолати, Қозоғистонда эса 30 та ҳолат аниқланган. Хитойда метапневмовирусга чалиниш кескин кўпаймоқда. Ушбу касаллик аллақачон Ўзбекистонда ҳам қайд этилган. Санепидқўмитага кўра, ушбу респиратор инфекцияларнинг сўнгги лаборатория таҳлиллари натижасига кўра: 36,9 фоизида грипп вируси, 30,2 фоизида риновирус, 28,6 фоизида респиратор-синситиал вирус, 1,2 фоизида метапневмовирус ва 3,1 фоизида бошқа вируслар аниқланган.

• Chaqaloq
• Ҳиндистон
• Вирус