Ўзбекистон футбол ассоциацияси биринчи вице-президенти Равшан Эрматов Португалияга қарши учрашувдаги йирик ҳисобли мағлубият юзасидан фикр билдирди.

Унинг таъкидлашича, Ўзбекистон терма жамоаси ҳали ривожланиш босқичида бўлиб, жаҳон футболининг етакчи жамоалари билан тенгма-тенг рақобатлашиш учун вақт ва тажриба зарур.

“Ҳисоб 0:2 бўлиб турган пайтда голимиз инобатга олинганида, ўйин бошқача тус олиши мумкин эди. Айрим вазиятларда адолатсизлик бўлди, бироқ буни ҳам қабул қилишимиз керак. Ҳар қандай ҳолатда ҳам биз ҳозир ривожланиш йўлидамиз. Мамлакатимизда футбол тараққиёти учун барча шароитлар яратилмоқда, аммо натижага эришиш учун вақт керак.

Биринчи синф ўқувчиси тўққизинчи синф ўқувчиси билан тенг рақобатлаша олмаганидек, биз ҳам ҳозирча жаҳон футболининг энг кучли жамоалари билан бир босқичда эмасмиз. Бу ўзимизни оқлаш эмас, балки вазиятга реал баҳо беришдир. Шундай кунлар келадики, ҳали Португалия Ўзбекистондан қўрқиб майдонга тушадиган бўлади. Агар ривожланиш йўлимиздан оғишмасак, албатта шундай даражага етамиз.

Беҳруз Каримовнинг 18 ёшида шундай йирик мусобақада юқори савияда ўйин кўрсатаётгани ҳам катта ютуқ. Бу бугунги Ўзбекистонда ёш футболчилар учун яратилган имкониятларнинг натижасидир. Жаҳон чемпионатидаги илк тажрибамиз бизга қайси жиҳатлар устида ишлашимиз кераклигини кўрсатмоқда. Ушбу турнир жамоамиз учун катта мактаб бўлиб хизмат қилмоқда ва келгусидаги муваффақиятлар учун муҳим пойдевор вазифасини ўтайди”, – деди Равшан Эрматов.

• Ассоциация
• Футбол
• Жаҳон чемпионати
• Ўзбекистон
• Португалия
• Равшан Эрматов
• Спорт