Қирғиз Республикаси Президенти Садир Жапаров иқтисодиётнинг бир қатор соҳалари учун енгилликларни назарда тутувчи Солиқ тизими ва солиқ маъмуриятчилигини такомиллаштириш чора-тадбирлари тўғрисидаги фармонни имзолади. Унга кўра, дастурий таъминот, ахборот тизимлари ва сунъий интеллектни ишлаб чиқиш соҳасидаги компаниялар ва тадбиркорларни беш йил муддатга солиқ тўлашдан озод қилиш таклиф қилинмоқда. Имтиёзларни блогерлар, стартаплар, аутсорсинг компаниялари, кино, видео ва телемаҳсулотлар ишлаб чиқарувчилар ва бошқа ижодий соҳалар вакиллари олишлари мумкин. Улар учун даромад солиғини 5 фоиз ва суғурта бадалларининг имтиёзли ставкасини ўртача иш ҳақининг 12 фоизи даражасида белгилаш таклиф этилмоқда.

Шу билан бирга, олтин ва кумушнинг жаҳон нархларини ҳисобга олган ҳолда, товарларни чегарадан ноқонуний олиб кирганлик учун жавобгарликни кучайтириш ҳамда олтин қазиб олувчи ва қайта ишловчи корхоналар учун солиқ юкини ошириш таклиф этилмоқда.

Фармон расмий эълон қилинган кундан эътиборан кучга кирди.

• Блогер
• Фармон
• Imtiyoz
• Қирғизистон
• Sadir Japarov
• Солиқ