“Ҳудудгаз Қорақалпоғистон” газ таъминоти филиалида 251,5 млрд сўмлик зарар аниқланиб, ҳолат юзасидан жиноят иши қўзғатилди. Бу ҳақда Бош прокуратура ҳузуридаги Департамент хабар берди.

Департаментнинг Қорақалпоғистон Республикаси бошқармаси томонидан ўтказилган терговга қадар текширувда филиалнинг масъул ходимлари томонидан қабул қилинган ва истеъмолчиларга етказиб берилган табиий газ ҳажми ўртасидаги тафовут сабаблари аниқланмагани маълум бўлди.

Тафовут масъул шахслар томонидан ҳисоботларда “оддий йўқотиш” сифатида қайд этилган. Оқибатда давлат ва жамият манфаатларига 251,5 млрд сўмлик зарар етказилгани аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ҳамда 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилди.

Ҳозирда ҳолат юзасидан тергов ҳаракатлари олиб борилмоқда.

Маълумот учун, бундан бир неча кун аввал Қорақалпоғистонда 741 млн сўмлик суюлтирилган газ баллонлари талон-торож қилингани ҳақида ҳам хабар берилган эди. “Кегейли туман газ” таъминоти бўлимининг моддий жавобгар шахслари томонидан 781 дона газ баллони ўзлаштириш йўли билан талон-торож қилингани аниқланган.