Русланбек Давлетов Ўзбекистон Президентининг вакиллик органлари, нодавлат нотижорат ташкилотлар ва ёшлар масалалари бўйича маслаҳатчиси лавозимидан озод этилди. Унинг ўрнига Олим Давлатов тайинланди. Бу ҳақда президент матбуот котиби Шерзод Асадов маълум қилди.

Давлетов мазкур лавозимда 2025 йил июль ойидан бери ишлаб келаётган эди. Ундан аввал Президент маслаҳатчиси сифатида ижтимоий-сиёсий ривожланиш масалалари билан шуғулланган.

Русланбек Давлетов 2017 йил август ойида Адлия вазири этиб тайинланган ва ушбу лавозимда 2022 йил ноябрь ойига қадар ишлаган. 2022 йил 15 ноябрда у Президентнинг ижтимоий-сиёсий ривожланиш масалалари бўйича маслаҳатчиси этиб тайинланган.

2025 йилдан бошлаб Президент администратсиясидаги тузилмавий ўзгаришлар натижасида унинг ваколатлари ва лавозими қайта шакллантирилиб, вакиллик органлари, ННТ ва ёшлар масалалари йўналиши белгиланган эди.

Давлетовнинг ўрнига тайинланган Олим Давлатов 2022 йил апрелидан Республика Маънавият ва маърифат маркази ҳузуридаги Ижтимоий-маънавий тадқиқотлар институти директори лавозимида ишлаб келган.

Шу тариқа Президент администратсиясида яна бир кадрлар ўзгариши амалга оширилди.