Саудия шаҳзодаси Лондондаги меҳмонхонада вафот этди

Саудия Арабистони қироллик оиласи аъзоси, 29 ёшли шаҳзода Абдуллоҳ бин Фаҳд бин Абдуллоҳ бин Абдулазиз бин Жаллавий Ол Сауд Лондондаги Marriott меҳмонхонасида вафот этгани маълум бўлди.

Маълумотларга кўра, у 2025 йил 25 ноябрь куни меҳмонхона хонасининг ювиниш хонасида жонсиз ҳолда топилган. Мазкур воқеа ҳақидаги маълумотлар саккиз ой давомида ошкор этилмаган.

Лондон Коронер судида эълон қилинган суд-тиббий экспертизаси хулосасига кўра, шаҳзоданинг ўлимига алкоголь ва бир нечта наркотик ҳамда дори воситаларининг биргаликдаги таъсири оқибатида юрак тўхташи сабаб бўлган. Экспертиза давомида унинг организмида гамма-гидроксибутират (ГҲБ), каннабис, алпразолам ва бошқа безовталикка қарши дори воситалари излари аниқланган.

Тергов маълумотларига кўра, шаҳзода вафотидан аввал алкоголь ва айрим дори воситаларига қарамликдан халос бўлиш мақсадида Лондондаги Priory Clinic ҳамда кейинчалик Rainford Hall хусусий клиникасида реабилитация курсини ўтаган.

Терговчилар шаҳзоданинг ўз жонига қасд қилганини тасдиқловчи ҳеч қандай далил топилмаганини маълум қилди. Шунингдек, учинчи шахсларнинг воқеага алоқадорлиги ҳам аниқланмаган. Кузатув камералари ёзувларига кўра, у ўлимидан олдинги вақтда меҳмонхонада ёлғиз бўлган.