Франция президенти Эммануэл Макрон сешанба куни вазирлар билан ўтказган ҳафталик учрашувида Исроил Бош вазири Бинямин Нетаняхуни огоҳлантирди.

1947 йил ноябрида БМТ Бош Ассамблеясида Британиянинг Фаластин мандатини тугатган ва ерни яҳудий ва араб давлатларига бўлган овоз бериш ҳақида гапириб, “Нетаняху ўз мамлакати БМТ қарори билан яратилганини унутмаслиги керак”, – деди Макрон.

“Демак, ҳозир БМТ қарорларини бузиш вақти эмас”, – дея қўшимча қилди у.

Эслатиб ўтамиз, Исроил БМТ тинчликпарвар кучлари жойлашган Ливан жанубида Эрон томонидан қўллаб-қувватланган “Ҳизбуллоҳ” жангари гуруҳига қарши қуруқликдан ҳужум уюштирмоқда.

Макроннинг БМТ қарорларини эътиборсиз қолдирмаслик чақириғи Ливандаги вазият ва Исроилнинг БМТ тинчликпарвар кучларини ўққа тутишини назарда тутган.

Исроил вакиллари эса бунга қарши баёнот берди.

“Исроил давлати БМТ резолюцияси натижасида эмас, балки мустақиллик учун урушда эришилган ғалаба туфайли, кўпчилиги Холокостни бошдан кечирган ёки Франциядаги Виши режимидан қочиб қутулган мард жангчиларнинг қони эвазига қозонилган”, – дейилади Нетаняхунинг матбуот хизмати баёнотида.

• Binyamin Netanyaxu
• Fransiya
• Isroil
• Макрон