Мазкур грант ва имтиёзли кредитлар электр энергия бозорини ривожлантириш ва энергия тизимлари интеграцияси дастури лойиҳалари учун йўналтирилади.

Жаҳон банки ижрочи директорлар кенгаши Марказий Осиёда электр энергияси бозорини ривожлантириш ва энергия тизимлари интеграцияси (РЕМИТ) дастурини тасдиқлади.

Уни амалга ошириш 10 йил давом этади. У уч босқичга бўлинган бўлиб, уларнинг асосий мақсади минтақа энергетика соҳасида ҳамкорликни ривожлантиришдан иборат.

Дастур Марказий Осиёда биринчи минтақавий электр энергияси бозорини яратиш, савдони ривожлантириш, электр узатиш тизимларининг ўтказувчанлик қобилиятини кенгайтириш ва қайта тикланадиган энергия манбаларининг минтақа мамлакатлари энергия тизимларига кенг кўламли интеграцияси учун асос яратишга қаратилган.

РЕМИТ дастурининг биринчи босқичида Қирғизистон, Тожикистон, Ўзбекистон ва бошқа Марказий Осиё давлатларига $143,2 млн қийматидаги грант ва имтиёзли кредитлар ажратилади.

Маблағларнинг $140 млни Жаҳон банкининг Халқаро тараққиёт ассоциацияси (ХТА) ресурсларидан ва $3,2 млни Марказий Осиё сув ва энергетика дастури (CАWЕП) грантлари кўринишида ажратилади.

Кейинги ўн йил ичида РЕМИТ дастури электр энергияси савдоси ҳажмини йилига камида 15 000 ГВт/соатгача оширишга ёрдам беради — бу бутун Марказий Осиё бўйлаб миллионлаб одамларнинг йиллик эҳтиёжларини қондириш учун етарли бўлади.

Шунингдек, у электр узатиш линияларининг ўтказувчанлик қувватини 16 ГВт гача уч баравардан кўпроққа оширишга, шунингдек, минтақа мамлакатларининг энергия тизимларига 9 ГВт гача тоза энергия қувватларини интеграция қилишга ёрдам беради.

Минтақавий энергетика интеграциясини мустаҳкамлаш яна-да мувозанатли ва барқарор энергия тизимини яратиш, электр таъминотидаги узилишларни камайтириш, уй хўжаликлари ва бизнес учун энергия нархини пасайтириш имконини беради.

• Электр энергияси
• Грант
• Imtiyoz
• Жаҳон банки
• Markaziy Osiyo