Жорий йилнинг 14 сентябрь – 6 октябрь кунлари юртимиз мезбонлик қиладиган футзал бўйича ФИФА Жаҳон чемпионати Тошкент, Андижон ва Бухоро шаҳарларида ўтказилади.

Чемпионат иштирокчилари ва мухлислар учун муносиб транспорт хизматлари кўрсатилишини таъминлаш бўйича аккредитациядан ўтган шахслар ҳамда ўйин кунлари чипталари мавжуд бўлган шахслар фарқловчи белгилар ёки аккредитация картаси ва чипталарни кўрсатган ҳолда шаҳар жамоат транспортидан бепул фойдаланиши мумкин. Бу ҳақда Транспорт вазирлиги хабар берди.

Жорий йилнинг 10 сентябрь кунидан 10 октябрь кунигача:

709/710 - сонли “Тошкент – Бухоро”;

729/730, 731/732, 733/734 - сонли “Тошкент – Андижон – Тошкент”;

125/126 - сонли “Андижон – Бухоро – Хива – Андижон”;

127/128 - сонли “Андижон – Бухоро – Қўнғирот – Андижон”;

129/130 - сонли “Андижон – Термиз - Андижон” йўналишларида ҳаракатланувчи йўловчи поездларга қўшимча 4 тадан йўловчи вагонлари уланган ҳолда ҳаракатланиши ташкиллаштирилади.

Бугунги кунда Андижон халқаро аэропорти фаолияти вақтинча тўхтатилганлиги, авиақатновлар Фарғона халқаро аэропортига амалга оширилаётгани муносабати билан чипталари мавжуд бўлган шахслар учун “Фарғона – Андижон – Фарғона” йўналишларида автобус қатновлари йўлга қўйилмоқда.

Тошкент Марказий, Тошкент-Жанубий, Андижон ҳамда Бухоро темир йўл вокзалларида чемпионат иштирокчиларига чипталарни тезкорлик билан расмийлаштириш мақсадида махсус чиптахоналар фаолияти ташкил этилиши ва 10 сентябрдан чиптахоналар ўз фаолиятини бошлаши белгиланган.

• Автобус
• Футзал
• Жаҳон чемпионати