Жиззах вилояти ҳуқуқ-тартибот идоралари ҳамкорлигида ўтказилган тезкор тадбирлар давомида воҳанинг турли ҳудудларида 3 нафар шахс кучли таъсир қилувчи психотроп ва наркотик моддалар билан қўлга олинди.

Ўтказилган тезкор тадбир давомида Жиззах шаҳрида яшовчи П.Э. 28 дона кучли таъсир қилувчи психотроп модда билан Ғаллаорол туманидаги “Сангзор-15” ЙПХ масканида ашёвий далил билан қўлга олинган.

Иккинчи тезкор тадбир Шароф Рашидов туманида амалга оширилиб, ушбу тадбир жараёнида шу туманда истиқомат қилувчи Б.О. бошқарувидаги ва унга тегишли бўлган Lacetti русумли автомашина тўхтатилиб, кўздан кечирилганида, 56 (ампула) дона кучли таъсир қилувчи дори воситаси борлиги аниқланган.

Шунингдек, Бахмал туманида яшовчи И.Ж. 509 грамм наркотик моддани Тошкент вилояти Бўка тумани ҳудудидаги яширин жойдан олиб, Жиззах вилоятига келтираётган вақтда қўлга олинган.

Ҳар учала ҳолатда кучли таъсир қилувчи ушбу дори воситалари ва гиёҳвандлик моддаси ашёвий далил сифатида олиб қўйилган.

“Мазкур ҳолатлар юзасидан Ўзбекистон Республикаси Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда”, – дея хабар бермоқда ЎзА.

• Гиёҳвандлик
• ИИБ
• Жиноят
• Жиззах