Discovery+ стриминг сервиси америкалик актёр Жонни Депп ва унинг собиқ рафиқаси, актриса Эмбер Херд ўртасидаги суд иши ҳақида суратга олинган ҳужжатли фильмни намойиш этади. Унга "Жонни Эмберга қарши: Американча суд" дея ном берилган бўлиб, тақдимот 19 сентябрь санасига режалаштирилган.

Маълум бўлишича, фильмда Деппнинг адвокатлари, ҳуқуқ масалалари бўйича экспертлар ва журналистлар билан суҳбатлар жамланган.

Фильмнинг илк эпизодида Деппнинг, иккинчи эпизодида эса Эмбер Херднинг нуқтаи назари ёритилади. Ҳар икки томоннинг келтирган далиллари ва ишдаги бурилиш нуқталарига таъсир кўрсатган ҳисоботлар тақдим этилади, бу эса томошабинларга кимга ишониш ва кимга ишонмасликни ўзлари ҳал қилишларига имкон беради.

Эслатиб ўтамиз, Жонни Депп ва Эмбер Херд бор-йўғи 15 ой давомида бирга ҳаёт кечирганлар. Актриса 2016 йилнинг май ойида Деппни зўравонликда айблаб, ажрашиш учун ариза берган. Херднинг айбловлари Деппнинг ижодий фаолиятига салбий таъсир кўрсатган ва уни йирик шартномалардан маҳрум қилган.

• Кино
• машҳурлар