Экология вазирлиги Диспетчерлик ва онлайн мониторинг марказий бошқармаси томонидан Бухорода 5 та онлайн кузатув камераси ўрнатилди.

Бу камералар Бухоро шаҳрининг “Б.Нақшбанд”, “Шербуддин”, “Меҳтар Амбар”, “А.Жомий” кўчалари ҳамда Когон туманидаги “Қизил гул” массивида ишга туширилди. Шунингдек, вилоят бўйича жами 20 та кузатув камералари жойлаштирилмоқда. Бу камералар ён-атрофни 360 даражада тасвирга олади.

Маълумот учун, айни дамда онлайн кузатув камералари Андижон, Наманган, Сирдарё, Самарқанд, Сурхондарё, Жиззах, Бухоро, Тошкент вилоятлари ва Тошкент шаҳрида мавжуд бўлиб, йил охирига қадар республикамизнинг қолган ҳудудларида ҳам ўрнатиш режалаштирилган. Камералар нафақат белгиланмаган жойга чиқинди ташлаш, балки бошқа турдаги экологик ҳуқуқбузарликларни ҳам ўз вақтида аниқлаш ва чора кўриш имконини беради.

Эслатиб ўтамиз, белгиланмаган жойга чиқинди ташлаганлик учун фуқароларга БҲМнинг 1-3 баравари (340 минг сўмдан 1 миллион 20 минг сўмгача), мансабдор шахсларга эса БҲМнинг 10-20 баравари (3 миллион 400 минг сўмдан 6 миллион 800 минг сўмгача) миқдорида жарима белгиланган.

• Бухоро
• kamera