Шимолий Корея етакчиси Ким Чен Ин ўз қизини янги қитъалараро ракета намойиши чоғида илк бор омма олдига олиб чиқди. Бу ҳақда Yonhap агентлиги хабар берди.

Давлат агентлигининг таъкидлашича, Ким Чен Ин стратегик қуролларни синовдан ўтказувчи полигонга “севикли қизи ва рафиқаси билан бирга жараёнга шахсан раҳбарлик қилиш учун” келган.

Жанубий кореялик журналистларнинг ёзишича, қизнинг исми Ким Чжу Э , у тўққиз ёшда.

Агентлик томонидан олинган тўртта суратда мактаб ёшидаги қиз Ким Чен Иннинг қўлидан ушлаб, янги ҳарбий техникалар атрофида айланиб юрганини кўриш мумкин.

Жанубий Кореянинг Кунмин университети профессори Андрей Ланковнинг сўзларига кўра, КХДР раҳбарининг қизи ракетанинг учирилишини томоша қилишга қизиққан. “Болалар самолётларни, ракеталарни, локомотивларни яхши кўрадилар. Нега кўрсатмаслик керак? Қолаверса, у малика ҳам. Нега малика буни томоша қилмаслиги керак?”.

Ланков, шунингдек, Ким Чен Ин демократик республикада бошқарув жиловини ўғлига эмас, қизига топшириши мумкинлигини ҳам инкор этмади.

“У ҳайратланарли даражада ота-боболарига хос бўлган патриархал хурофотлардан озоддир. Шунга қарамай, мен у ўз қизини оммага намойиш қилишидан жуда чуқур хулоса чиқармаган бўлардим. Кимнинг оиласида шаҳзодалар ва маликалар кўп”, - дея таъкидлаган эксперт.

• Kim Chen In
• Шимолий Корея