Давлат хавфсизлик хизматининг Тошкент вилояти бўйича бошқармаси ҳамда вилоят прокуратураси ҳамкорлигида маданий мерос объектларидаги бир нечта қонунбузилиш ҳолатларига чек қўйилди.

Хусусан, шлакоблок ишлаб чиқарувчи МЧЖ раҳбари А.У. 2019 йилда ҳокимият тизимидаги мансабдор шахслар билан келишган ҳолда қалбаки ҳужжатлар асосида, Нурафшон шаҳридаги «Улкан Тўйтепа» археология ёдгорлиги ҳудудининг 30 сотих ер майдонини ўз номига расмийлаштириб олган.

2020–2021 йиллар давомида у мазкур ер майдонида шлакоблок ишлаб чиқариши ва бу учун керак бўладиган иншоотларни қуриши оқибатида маданий мерос объектига 306 млн. 720 минг сўм миқдорида зарар етказган.

Келтирилишича, жиноят ишлари бўйича Нурафшон шаҳар судининг ҳукмига асосан А.У. Жиноят Кодексининг 132 ва 228-моддалари билан айбдор деб топилиб, унга нисбатан 1 йил 7 ой муддатга озодликдан маҳрум қилиш жазоси тайинланган.

Шунингдек, 2018 йилда Қибрай туманидаги «Қиличли ота» зиёратгоҳида қайта таъмирлаш ва тиклаш ишларини амалга ошириш учун қурилиш соҳасида фаолият юритувчи МЧЖга 355 млн. 473 минг сўм миқдорида бюджет маблағи ажратилган.

Бироқ МЧЖ раҳбари Н.Ҳ. бажарилган ишлар бўйича тузилган ҳисоб-фактураларга сохта маълумотлар киритиб, амалда бажарилмаган иш ҳажмини қўшиб ёзиш орқали 263 млн. 286 минг сўм миқдоридаги маблағни талон-тaрож қилган.

Жиноят ишлари бўйича Қибрай туман судининг ҳукмига асосан Н.Ҳ. Жиноят Кодексининг 167 ва 228-моддалари билан айбдор деб топилиб, унга нисбатан 5 йил 1 ой муддатга озодликдан маҳрум қилиш жазоси тайинланган.

• ДХХ
• Маданий мерос
• Прокуратура
• Toshkent viloyati