Бугун, 14 июль 2025-йилги Клублар ўртасидаги Жаҳон чемпионати финалида Англиянинг “Челси” ва Франциянинг ПСЖ жамоалари ўзаро тўқнаш келди. Ҳал қилувчи ўйин АҚШнинг “МетЛифе” стадионида бўлиб ўтди. Ушбу қарама-қаршиликда лондонликлар йирик 3:0 ҳисобида ғалаба қозониб янги форматдаги КЖЧнинг биринчи чемпионларига айланди. “Аристократлар” биринчи бўлимдаёқ ўйин тақдирини ҳал қилди. Коул Палмер 22 ва 30-дақиқаларда икки бора парижликлар дарвозабонини ранжитган ҳолда дубль қайд этган бўлса, баҳснинг 43-дақиқасига келиб Жоао Педро ҳисобни йириклаштирди – 3:0.

Иккинчи бўлимда ПСЖ бир неча бор ҳисобни қисқартиришга уриниб кўрди. Бироқ якунда буларнинг барчаси самарасиз бўлди.

Шунингдек, ўйиннинг 86-дақиқасида ПСЖ футболчиси Жоау Невеш рақиб жамоа ҳимоячиси Марк Кукуреляни сочидан тортганлиги учун эронлик ҳакам унга қизил карточка кўрсатди.

Шу тариқа, “Челси” янги форматдаги Клублар ўртасидаги Жаҳон чемпионатининг илк чемпионига айланди.

• Челси
• Футбол
• Клублар ўртасида Жаҳон чемпионати
• PSJ