Зангезур баҳси: АҚШ воситачиликка киришиб, йўлни ижарага олмоқчи

TRT Глобалнинг хабарига кўра, АҚШ Арманистон ва Озарбайжон ўртасидаги 32 километрлик Зангезур йўлаги устидан назоратни ўз зиммасига олмоқчи.

Таклиф Ереван ва Боку ўртасидаги музокаралардаги келишмовчиликларни бартараф этишга қаратилган.

Тегишли маълумотни АҚШнинг Туркиядаги элчиси Том Баррак тасдиқлаган. У Вашингтон коридорни хусусий Америка компанияси орқали 100 йилга ижарага олишга тайёрлигини айтган.

Улар 32 километрлик йўл учун тортишмоқда, лекин бу ҳазил эмас. Бу ўн йилдан бери давом этаётган муаммо. АҚШ келиб шундай дейди: “Яхши, бу йўлни бизга беринг. Уни биз 100 йилга ижарага оламиз, шунда уни ўзаро тақсимлашингиз мумкин”, деди элчи.

Зангезур Озарбайжоннинг ғарбий вилоятлари ва унинг Нахчивон эксклавини Арманистон билан боғлайди. Middle East Eye хабарига кўра, Арманистон ташаббусга Нахчивондаги йўл қисмини ҳам киритишни талаб қилмоқда, Озарбайжон эса бунга қарши. Озарбайжон, ўз навбатида, тўсиқсиз ўтиш кафолатларини талаб қилмоқда ва Ереваннинг маршрут устидан тўлиқ назоратига қарши чиқмоқда.

Маълум қилинишича, Зангезур йўлаги бўйича музокаралар Арманистон ва Озарбайжон ўртасида имзоланадиган тинчлик битимига тайёргарлик доирасида олиб борилмоқда. 2025 йил март ойига келиб, икки давлат битимдаги 17 моддадан 15 тасини, жумладан, кириш (преамбула) қисмини ҳам келишиб олган. Энди фақат халқаро суд даъволари ва учинчи томонларнинг иштироки билан боғлиқ масалалар очиқ қолган.

Туркия президенти Ражаб Тоййиб Эрдўғон июль ойи бошида Арманистоннинг ёндашувида ижобий ўзгаришлар бўлганини таъкидлаганди.

“Гарчи Арманистон дастлаб Зангезур йўлагига қарши чиққан бўлса-да, ҳозирда у иқтисодий интеграцияга нисбатан мослашувчанроқ ёндашувни қўллаб-қувватламоқда”, — деган у.

Сиёсатчи минтақанинг ривожланиши нафақат Эрон учун, балки бутун Жанубий Кавказ учун ҳам манфаатли эканини қайд этган.

• АҚШ
• Арманистон
• Озарбайжон