Ўзбекистон Республикаси президенти Шавкат Мирзиёевнинг Бирлашган Араб Амирликларига расмий ташрифи доирасидаги тадбирлар якунига етди.

Ўзбекистон етакчиси Амирликлар пойтахти Абу-Даби шаҳрида БАА президенти Шайх Муҳаммад бин Зоид Ол Наҳаён билан самарали музокаралар ҳамда ушбу мамлакатнинг етакчи давлат ташкилотлари, компания ва банклари раҳбарлари билан учрашувлар ўтказди.

Музокаралар якунида икки томонлама ҳужжатлар тўплами, шу жумладан Стратегик шериклик ўрнатиш тўғрисида декларация қабул қилинган.

Ўзбекистон раҳбари “Абу-Даби барқарор ривожланиш ҳафталиги” халқаро саммити очилиши ҳамда барқарор ривожланиш соҳасидаги Шайх Зоид номидаги мукофотни топшириш маросимида иштирок этиб, саммитнинг ялпи мажлисида қатор муҳим ташаббусларни илгари сурган.

Бугун Дубай шаҳрида Бирлашган Араб Амирликлари витсе-президенти, бош вазири, Дубай Амири Шайх Муҳаммад бин Рошид Ол Мактум билан музокаралар бўлиб ўтган.

Ташриф якунида Дубай халқаро аэропортида олий мартабали меҳмонни Дубай фуқаро авиацияси бошқармаси президенти, “Эмиратес” компаниялар гуруҳи раиси ва бош директори Шайх Аҳмад бин Саид Ол Мактум ва БАА ҳукумат ишлари бўйича вазири Муҳаммад бин Абдулла ал-Гаргавий кузатиб қўйган.

• БАА
• Президент
• Шавкат Мирзиёев
• Ташриф