Давлатимиз раҳбарининг Мўғилистонга давлат ташрифи давом этмоқда. Бир оз аввал Улан-Батордаги Сухбаатара майдонида Ўзбекистон Республикаси Президенти Шавкат Мирзиёев ва рафиқаси Зироат Мирзиёевани Мўғулистон президенти Ухнаагийн Хурелсух ва рафиқаси Лувсандоржийн Болорсесег томонидан расмий кутиб олиш маросими бўлиб ўтди.

Фахрий қоровул саф тортди, икки давлат мадҳиялари янгради. Шундан сўнг президентлар Давлат Оқ ҳарбий байроққа ҳурмат бажо келтирдилар ва фахрий қоровул ёнидан ўтдилар.

Президентлар икки мамлакат делегациялари, Мўғулистондаги дипломатик миссиялар раҳбарлари ва халқаро ташкилотлар вакилларини қутладилар.

Шавкат Мирзиёев ва Ухнаагийн Хурелсух Чингисхон ҳайкалига ҳурмат бажо келтириб, Давлат саройига йўл олишди. У ерда Ўзбекистон Президенти Шавкат Мирзиёев фахрий меҳмонлар китобига дастхат ёзиб қолдирди.

Эслатиб ўтамиз, мазкур ташриф икки мамлакат ўртасида дипломатик алоқалар ўрнатилганидан сўнг Ўзбекистон Республикаси Президентининг Мўғулистонга амалга оширган илк давлат ташрифи ҳисобланади.

• Мирзиёев
• Ташриф
• монголия