Навоий вилояти ИИБ ахборот хизмати маълум қилишича, Навоий шаҳридаги хусусий боғчада болаларга қўпол муомала қилиб, уларни урган тарбиячига нисбатан жиноят иши қўзғатилди.

Жорий йилнинг 8 апрель куни ижтимоий тармоқларда Навоий шаҳридаги хусусий мактабгача таълим муассасаси тарбиячиси тарбияланувчиларга қўпол муносабатда бўлиб, уларни қийнаб, дўппослаганлик ҳолати акс этган видеохабар тарқалди. Ушбу видеотасвирлардаги ҳолат юзасидан Навоий вилояти ИИБ томонидан тезкор-суриштирув ишлари олиб борилганда, мазкур ҳолат жорий йилнинг 7 апрель куни Навоий шаҳар “Янгиариқ” МФЙда жойлашган фуқаро С.С. раҳбарлиги остида бўлган хусусий мактабгача таълим муассасасида содир этилганлиги, мазкур таълим муассасасида тарбиячи бўлиб ишлаб келаётган 2003 йилда туғилган фуқаро Э.Н. ўзининг қарамоғи остидаги гуруҳида тарбияланаётган болаларни гўёки, тартибга солиш усули сифатида аёвсиз калтаклаганлиги аниқланган.

Шунингдек, ўрганишлар давомида гумонланувчи томонидан жорий йилнинг март ойидан апрель ойига қадар бўлган вақт оралиғида қарамоғида бўлган болаларни ўзини-ўзи ҳимоя қилиш имконияти чекланганлиги ва ожиз аҳволда эканлигидан фойдаланиб, дўппослаш ва зўрлик ишлатиб содир этиладиган бошқа ҳаракатлар билан муттасил равишда қийнаб келганлиги маълум бўлди.

Мазкур ҳолат юзасидан Э.Н.га нисбатан Навоий шаҳар ИИБ ҳузуридаги Тергов бўлими томонидан Ўзбекистон Республикаси Жиноят кодексининг 110-моддаси 2-қисми билан жиноят иши қўзғатилган ва фуқаро гумонланувчи тариқасида процессуал тартибда ушланган. Ҳозирда дастлабки тергов ҳаракатлари олиб борилмоқда.

“Тергов якунига кўра айбдор шахсларга нисбатан қонуний қарор қабул қилиниши таъминланади”, – дейилади хабарда.

• Болалар
• Болалар боғчаси
• Kaltaklash
• Навоий