Тошкентда пойга ишқибози бўлган ёшларнинг қизиқиши ва таклифлари ўрганилиб, улар учун махсус жой ташкил этиш масаласи кўриб чиқилади. Бу ҳақдаги таклиф Халқ депутатлари Тошкент шаҳар Кенгашининг олтмиш иккинчи сессиясида шаҳар ҳокими Жаҳонгир Ортиқхўжаев томонидан берилди.

Шаҳар ҳокими пойга ишқибози бўлган тошкентлик ёшларнинг қизиқиши ва таклифлари ўрганилиб, улар учун махсус жой ташкил этиш масаласи кўриб чиқилиши бўйича таклиф ишлаб чиқишга топшириқ берди.

“Тошкент шаҳрида охирги вақтда ёшлар ўртасида “дрифт”лар қилиш оммалашиб боряпти. Ёшларда пойга ўйнашга, “дрифт”лар қилишга эҳтиёж бор. Биз ҳар нарсага тақиқ қўймасдан, буни олдини олишга эътибор беришимиз керак. Бу жамиятга зарар берадиган спорт эмас. Бунга ёшларнинг "қони қайнаган" ёшидаги ҳаваскорлиги даражасида қараганимиз маъқул.

Агар керак бўлса, уларга полигон қуриб берамиз ва халқаро спортларни ташкил қиламиз. Бу сайёҳларни жалб қилишга ҳамда тақиқланган жойларда бундай ишларни қилишни олдини олиш бўлади", – деди Ортиқхўжаев.

• Автопойга
• Ортиқхўжаев
• Тошкент