Қозоғистон президенти Қосим-Жўмарт Тўқаев Марказий Осиёда экологик фожианинг олдини олиш учун Оролни қутқариш халқаро жамғармасига кўпроқ маблағ ажратиш кераклигини таъкидлади. Бу ҳақда 8 июнь куни Остонада бошланган халқаро форумда айтиб ўтилди.

“Амударё ва Сирдарё – минтақамиздаги икки буюк дарёнинг сув сатҳи 2050 йилга бориб тахминан 15 фоизга камаяди. Сув муаммоси ва иқлим ўзгариши ўзаро боғлиқ муаммолардир. Марказий Осиё шундай минтақаки, сув хавфсизлиги фақат яқин ҳамкорлик ва биргаликдаги самарали чора-тадбирлар орқалигина таъминланиши мумкин”, – деди Тўқаев.

Қозоғистон раҳбари шу каби жиддий экологик муаммоларни муҳокама қилиш учун 2026 йилда Қозоғистонда БМТ ва бошқа халқаро ташкилотлар шафелигида Минтақавий иқлим саммитини ўтказишни таклиф қилган.

Остона халқаро форумида Ўзбекистон бош вазири Абдулла Арипов ҳам қатнашди.

“Kazinform” хабарига кўра, Арипов ҳам ўз чиқишида халқаро ҳамжамият, хусусан, хорижий инвесторларни Орол муаммосини ҳал этишга чақирган.

• Форум
• Ороль денгизи