“WАМ” ахборот агентлиги хабар қилишича, БААда ташриф билан бўлган Ўзбекистон Республикаси ташқи ишлар вазири Бахтиёр Саидов ва унга ҳамроҳлик қилган делегация Миллий метеорология марказига ҳам борган.

Мамлакатимиз ташқи сиёсат идораси раҳбари метеорология имконияти ва инфратузилмаси билан танишди, бош прогнозлаш, иқлим бўлими, мутахассислар малакасини ошириш марказини кўздан кечирди. Об-ҳаво маълумотини кузатиш тизими, юқори самарадор компьютер инфратузилмаси ва ахборотни таҳлил қиладиган илғор воситалар мажмуаси каби объектлар бўйлаб кенг қамровли экскурсия доирасида марказ томонидан қўлланаётган энг сўнгги технология, методология меҳмонларда қизиқиш уйғотди.

Б.Саидов БААнинг сунъий ёмғир ҳосил қилиш ва сув ресурсларини бошқаришга доир илғор тажрибани диққат билан кузатди. Минтақадаги илк тўрт ўлчовли илмий гумбазда ернинг шаклланишига бағишланган интерактив тақдимотнинг гувоҳи бўлди.

У БАА метеорология соҳасида эришган ютуқларни, марказнинг техник имконияти ва замонавий инфратузилмасини юқори баҳолади, бу мамлакатнинг айни соҳада ҳам энг сўнгги технологиялар, энг яхши хизматлар тақдим этишга интилишидан далолат беришини таъкидлади.

Бахтиёр Саидов БАА иқлим ўзгариши ва атроф-муҳит вазири Марям Алмайрий билан ҳам учрашди.
– Сув танқислиги муаммосини бартараф этиш, сувни чучуклаштириш, биологик хилма-хилликни ҳимоя қилиш, янги дарахтзорлар барпо этиш бўйича саъй-ҳаракатларни бирлаштириш ҳамда БААнинг мазкур йўналишдаги илғор тажрибасини Ўзбекистонда татбиқ этишга алоҳида эътибор қаратдик, – деди республикамиз ТИВ раҳбари.

• БАА
• Бахтиёр Саидов