2024 йилнинг ўтган ўн бир ойи якунига кўра, Қозоғистон Ўзбекистоннинг уч асосий савдо ҳамкорларидан бири бўлган.

Ўзбекистон Республикаси Статистика агентлиги маълумотига кўра, 2024 йил январь-ноябрь ойларида мамлакатимиз ташқи савдоси қиймати 59,4 миллиард долларни ташкил этиб, ўтган йилнинг шу даврига нисбатан 3,6 фоиз ўсган.

Қайд этилишича, бугунги кунда Ўзбекистон 195 давлат билан иқтисодий алоқаларни йўлга қўйган. Савдо айланмаси бўйича Хитой (19 фоиз), Россия (18 фоиз), Қозоғистон (6,5 фоиз), Туркия (4,4 фоиз) ва Корея Республикаси (3 фоиз) етакчилик қилмоқда.

Хусусан, Қозоғистонга 1,3 миллиард долларлик маҳсулот экспорт қилинган, ушбу давлатдан импорт миқдори эса 2,5 миллиард долларга тенг.

Мутахассислар фикрига кўра, Қозоғистон Ўзбекистоннинг йирик ташқи иқтисодий ҳамкорларидан бирига айланиши умумий чегара мавжудлиги билан боғлиқ. Шунингдек, МДҲ эркин савдо зонаси ҳамда ўзаро иқтисодий муносабатлар либераллашуви ҳам бу борадаги ижобий ўсишни таъминламоқда.

• Ҳамкорлик
• Ўзбекистон
• Қозоғистон
• Ташқи савдо