Ўзбекистон ва Тожикистон ўртасидаги дўстлик ва стратегик ҳамкорлик алоқаларини мустаҳкамлаш мақсадида Душанбе шаҳрида “Дўстлик боғи” ташкил этилмоқда. Ушбу лойиҳа икки давлат ўртасидаги экологик барқарорлик ва қишлоқ хўжалигини ривожлантириш йўналишида ҳам муҳим аҳамиятга эга.

Жорий йилнинг 12 февраль куни Агросаноатни ривожлантириш агентлиги директори Тожикистон Республикасига ташриф буюриб, Тожикистон Қишлоқ хўжалиги вазири биринчи ўринбосари Асозода Нуралй Маҳмадулло билан учрашув ўтказган. Учрашув давомида боғ лойиҳаси муҳокама қилиниб, амалга ошириш чоралари белгиланган. Ташриф давомида расмийлар Душанбе шаҳрида жойлашган “Дўстлик боғи” учун ажратилган ҳудудни бориб кўриб, лойиҳа босқичларини муҳокама қилишган. Учрашув якунида зарур тавсиялар ишлаб чиқилиб, шу куни лойиҳанинг амалий ишларига старт берилган.

Қишлоқ хўжалиги вазирлиги тизимидаги Агросаноатни ривожлантириш агентлиги томонидан амалга ошириладиган ишлар:

Томчилатиб суғориш тизимини жорий этиш – сувдан самарали фойдаланиш ва экинларнинг яхши ўсиши учун замонавий суғориш технологиялари ўрнатилади.

Кўчатлар етказиб бериш – Ўзбекистондан юқори сифатли Тожикистон иқлимига мослаштирилган мевали дарахт кўчатлари олиб келиниб, уларнинг барқарор ўсишини таъминлаш учун махсус агротехник хизматлар ҳам кўрсатилади.

Ер тайёрлаш ва унумдорликни ошириш – боғ учун ажратилган ер майдонида унумдорликни ошириш ишлари олиб борилади, сифатли ўғитлар билан таъминланади.

Боғ инфратузилмасини яратиш – суғориш тизимлари, ҳимоя ва парвариш қилиш тизимлари, боғ дизайни ва экиш жараёнлари тўлиқ режалаштирилади.

Агрономик маслаҳатлар ва тажриба алмашиш – Ўзбекистондан тажрибали мутахассислар жалб қилиниб, Тожикистонлик қишлоқ хўжалиги соҳаси вакиллари билан илмий-амалий ҳамкорлик йўлга қўйилади.

• Ҳамкорлик
• Ўзбекистон
• Тожикистон